پشاور بورڈ آف انٹرمیڈیٹ اینڈ سیکنڈری ایجوکیشن نے جماعت نہم اور دہم کے سالانہ امتحانات 2025 کے نتائج کا اعلان کر دیا ہے۔
دستاویزات کے مطابق میٹرک کے امتحانات میں مجموعی طور پر 91 ہزار 589 طلباء و طالبات نے شرکت کی جن میں سے 14 ہزار 530 طلباء فیل جبکہ 76 ہزار 484 کامیاب قرار پائے۔ اسی طرح میٹرک کے نتائج کا مجموعی تناسب 83.5 فیصد رہا۔
دوسری جانب جماعت نہم کے امتحانات میں ایک لاکھ ایک ہزار 888 طلباء و طالبات نے حصہ لیا جن میں سے 61 ہزار 753 کامیاب جبکہ 38 ہزار 907 مختلف پرچہ جات میں فیل قرار پائے۔ نہم جماعت کے نتائج کا تناسب 98.8 فیصد رہا۔ تاہم دستاویزات کے مطابق دہم جماعت کے فیل طلباء کو اگلی جماعت میں پروموٹ کر دیا گیا ہے۔
اعداد و شمار کے مطابق نہم جماعت میں 35 ہزار 17 طالبات جبکہ میٹرک کے امتحانات میں 31 ہزار 722 طالبات نے حصہ لیا۔ نتائج کے مطابق میٹرک سائنس گروپ میں پشاور ماڈل اسکول گرلز برانچ ٹو کی فاطمہ جگنو نے 1180 نمبرز کے ساتھ پہلی پوزیشن حاصل کی۔
اسی ادارے کی سارہ عمران نے 1178 نمبرز لے کر دوسری پوزیشن جبکہ شمائلہ نے 1176 نمبرز کے ساتھ تیسری پوزیشن حاصل کی۔ پوزیشن ہولڈرز میں پشاور ماڈل اسکول گرلز برانچ دلہ زاک روڈ کی عائنہ شعیب بھی شامل ہیں، جنہوں نے 1176 نمبرز کے ساتھ تیسری پوزیشن حاصل کی۔