پاکستانی طلبا کے لیے برطانیہ میں مفت اعلیٰ تعلیم حاصل کرنے کا شاندار موقع دستیاب ہے برطانوی حکومت کے بین الاقوامی اسکالر شپ پروگرام چیوننگ (Chevening) کے تحت اسکالر شپ کے لیے درخواستیں جمع کرانے کا سلسلہ جاری ہے۔
چیوننگ اسکالرشپ دنیا بھر سے ذہین، باصلاحیت اور قیادت کی صلاحیت رکھنے والے نوجوانوں کو برطانیہ کی معروف جامعات میں ماسٹرز کی سطح پر تعلیم حاصل کرنے کا موقع فراہم کرتی ہے۔ یہ اسکالر شپ برطانوی وزارتِ خارجہ، دولتِ مشترکہ اور ترقیاتی امور اور اس کے شراکت دار اداروں کی مالی معاونت سے دی جاتی ہے۔
اسکالر شپ میں منتخب طلبہ کو جو سہولیات فراہم کی جائیں گی ان میں ، مکمل ٹیوشن فیس، برطانیہ کا ویزہ، رہائش کی سہولت، ماہانہ وظیفہ/الاؤنس شامل ہیں۔
اسکالر شپ کے لیے از کم دو سالہ تجربہ رکھنے والے مڈکیریئر پروفیشنلز درخواست دینے کے اہل ہوں گے۔
درخواستیں 7 اکتوبر 2025 تک جمع کرائی جا سکتی ہیں۔ امیدواروں کو مشورہ دیا گیا ہے کہ وہ جلد از جلد اپنی درخواستیں مکمل کریں۔
درخواست دینے کے لیے تمام پراسیس آن لائن ہے جس کے لیے چیوننگ اسکالرشپ کی آفیشل ویب سائٹ پر جا کر آن لائن اپلیکیشن سسٹم کے ذریعے فارم جمع کرانا ہوگا۔ تمام امیدواروں کو ہر مرحلے پر اپنے یونیک ایکسیس کوڈ کی ضرورت ہوگی جو محفوظ رکھنا ضروری ہے۔
برطانوی ہائی کمشنر نے کہا ہے کہ چیوننگ صرف ایک اسکالر شپ نہیں بلکہ یہ مستقبل کے لیڈرز کے لیے ایک لانچ پیڈ ہے۔
یہ پروگرام پاکستان سمیت دنیا کے متعدد ممالک میں نوجوان قیادت کو ابھارنے کے لیے برطانوی حکومت کی ایک اہم کوشش کے طور پر دیکھا جاتا ہے۔