خیبرپختونخوا میں حالیہ سیلاب نے تعلیمی نظام کو شدید نقصان پہنچایا ہے صوبے میں مجموعی طور پر 61 اسکول مکمل تباہ جبکہ 324 اسکول جزوی طور پر متاثر ہوئے ہیں۔
محکمہ ابتدائی و ثانوی تعلیم کی جانب سے جاری رپورٹ کے مطابق مکمل تباہ ہونے والے اسکولوں میں 52 پرائمری، 7 مڈل اور 2 ہائی اسکول شامل ہیں۔ جزوی متاثرہ اسکولوں میں 233 پرائمری، 35 مڈل، 42 ہائی اور 14 ہائر سیکنڈری اسکول شامل ہیں۔
سب سے زیادہ نقصان ضلع سوات میں ہوا جہاں 91 اسکول مکمل طور پر تباہ اور 30 جزوی طور پر متاثر ہوئے۔ شانگلہ میں 11 اسکول مکمل تباہ جبکہ 50 کو جزوی نقصان پہنچا۔ ہری پور میں 7 اسکول مکمل تباہ اور 29 متاثر ہوئے، دیر لوئر میں 17 اسکول مکمل طور پر تباہ ہو گئے۔
اسی طرح ایبٹ آباد میں 3 اسکول مکمل تباہ جبکہ 67 جزوی متاثر ہوئے، بونیر میں 4 اسکول مکمل تباہ اور 14 کو نقصان پہنچا۔ بٹگرام میں 9 اسکول مکمل طور پر تباہ جبکہ 6 اسکول جزوی متاثر ہوئے۔
رپورٹ کے مطابق سیلاب کے دوران تدریسی عملے کے 4 اور غیر تدریسی عملے کے 2 افراد جاں بحق ہوئے اور 3 اساتذہ زخمی ہوئے جبکہ 2 طلبہ کے جاں بحق ہونے اور 2 کےزخمی ہونے کے واقعات بھی سامنے آئے ہیں۔