پنجاب فوڈ اتھارٹی نے راولپنڈی میں جامع مسجد روڈ کے قریب کارروائی کرتے ہوئے سات سو کلو مضر صحت اور ناقص گوشت برآمد کر کے تلف کر دیا۔ دوران کارروائی ایک شخص کو گرفتار کر کے تھانہ بنی میں مقدمہ بھی درج کر لیا گیا۔
فوڈ اتھارٹی کا کہنا ہے کہ برآمد شدہ گوشت پر منظور شدہ سلاٹر ہاؤس کی مہر موجود نہیں تھی اور ابتدائی جانچ میں ثابت ہوا کہ یہ گوشت بیمار جانوروں کا ہے۔ حکام کا کہنا ہے کہ گوشت میں پانی ملا کر اس کا وزن بڑھایا گیا تھا اور ویٹرنری ڈاکٹر نے معائنے کے بعد اسے انسانی صحت کے لیے مضر قرار دیا ہے۔
پنجاب فوڈ اتھارٹی کا کہنا ہے کہ صوبے بھر میں ناقص اور مضر صحت گوشت فروخت کرنے والوں کے خلاف سخت کارروائیاں جاری ہیں تاکہ شہریوں کو معیاری اور محفوظ خوراک فراہم کی جا سکے۔