راولپنڈی میں تھانہ ریس کورس کی حدود میں دل دہلا دینے والا واقعہ پیش آیا، جہاں ایک شہری کو قتل کرنے کے بعد لاش کو آگ لگا دی گئی۔ مقتول کی شناخت شاہد علی ولد نزیر کے نام سے ہوئی ہے۔
پولیس کے مطابق شہری کو پہلے ڈھوک سیداں میں قتل کیا گیا جس کے بعد لاش کو ایک زیر تعمیر مکان میں لے جا کر آگ لگا دی گئی۔ اطلاع ملتے ہی سی پی او راولپنڈی سید خالد ہمدانی نے واقعے کا نوٹس لیتے ہوئے ڈی ایس پی کینٹ کو نفری سمیت موقع پر پہنچنے کی ہدایت دی۔ پولیس نے شواہد اکٹھے کر کے لاش کو پوسٹمارٹم کے لیے اسپتال منتقل کر دیا ہے۔
پولیس ترجمان کے مطابق مقتول کی اہلیہ نے اپنے آشنا اور بھائی کے ساتھ مل کر قتل کی منصوبہ بندی کی۔ شبہ ظاہر کیا جا رہا ہے کہ شاہد علی کو پہلے نشہ آور شے پلا کر بیہوش کیا گیا اور پھر تشدد کے ذریعے قتل کیا گیا۔ قتل کے بعد ملزمان نے لاش پر تیزاب پھینک کر شواہد مٹانے کی بھی کوشش کی۔
ترجمان پولیس نے بتایا کہ مقتول کی اہلیہ کے ایک بھائی کو گرفتار کر کے انٹروگیشن شروع کر دی گئی ہے جبکہ دیگر ملزمان کی گرفتاری کے لیے خصوصی ٹیمیں تشکیل دے دی گئی ہیں۔ سی پی او راولپنڈی نے کہا ہے کہ ملزمان کو جلد گرفتار کر کے انصاف کے کٹہرے میں لایا جائے گا۔