کراچی کے علاقے اورنگی ٹاؤن سیکٹر 11 میں دن دہاڑے ڈکیتی مزاحمت پر سفاک ملزمان نے بچوں کے سامنے ایک باپ کو گولیاں مار کر قتل کردیا۔
پولیس کے مطابق واقعہ رحمت چوک کے قریب پیش آیا جہاں فیصل آباد سے آئے 25 سالہ سجاد شوکت اپنے بچوں کے ہمراہ گھر کے دروازے پر کھڑے تھے کہ موٹر سائیکل سوار دو ملزمان نے لوٹ مار کی کوشش کی۔ سجاد نے مزاحمت کی تو ایک ملزم نے انتہائی قریب سے فائرنگ کردی جس کے نتیجے میں وہ موقع پر جاں بحق ہوگیا۔
سی سی ٹی وی فوٹیج میں دیکھا جا سکتا ہے کہ مقتول کے گود میں ایک بچہ موجود تھا جبکہ دوسرا قریب کھڑا تھا۔ گولی لگنے پر مقتول گھر کی دہلیز پر گر پڑا اور بچے خوفزدہ ہو کر اندر بھاگ گئے۔
فائرنگ کرنے والے ملزم کا چہرہ فوٹیج میں واضح نظر آ رہا ہے جبکہ ساتھی ملزم موٹرسائیکل پر موجود تھا۔ واقعے کے بعد ملزمان باآسانی فرار ہو گئے۔
ڈی آئی جی ویسٹ نے واقعے کا نوٹس لیتے ہوئے ایس ایچ او اقبال مارکیٹ کو معطل کر کے عہدے میں تنزلی کر دی۔ پولیس حکام کا کہنا ہے کہ سی سی ٹی وی فوٹیج کی مدد سے ملزمان کی شناخت اور گرفتاری کے لیے کارروائیاں تیز کر دی گئی ہیں۔