ایف آئی اے کراچی زون نے حوالہ ہنڈی اور غیر قانونی کرنسی ایکسچینج میں ملوث 3 ملزمان کو گرفتار کرکے کروڑوں روپے مالیت کی ملکی وغیر ملکی کرنسی برآمد کرلی۔
ایف آئی اے اسٹیٹ بینک سرکل اور کمرشل بینکنگ سرکل کراچی نے صدر اور آرام باغ کے علاقوں میں کارروائیاں کرتے ہوئے 3 ملزمان وقاص چندا، سجاد حسین اور عثمان آفریدی کو گرفتار کیا، گرفتار ملزمان کے قبضے سے 4 کروڑ 35 لاکھ روپے اور 2000 سعودی ریال برآمد ہوئے۔
ایف آئی اے کی ابتدائی تفتیش کے مطابق ملزمان حوالہ ہنڈی اور غیر قانونی کرنسی ایکسچینج میں ملوث ہیں، گرفتار ملزمان سے موبائل فونز، غیر قانونی کرنسی ایکسچینج اور حوالہ ہنڈی سے متعلق شواہد بھی برآمد کرلیے گئے۔
ایف آئی اے کے مطابق ملزمان برآمد ہونے والی کرنسی کے حوالے سے حکام کو مطمئن نہ کرسکے، ملزمان کو گرفتار کر کے تفتیش شروع کردی گئی، ملزمان کے دیگر ساتھیوں کی گرفتاری کے لیے چھاپے مارے جا رہے ہیں۔