کراچی سے حوالہ ہنڈی میں ملوث 2 ملزمان گرفتار، ایک لاکھ ڈالر برآمد

وفاقی تحقیقاتی ادارے (ایف آئی اے) کراچی زون نے کارروائی کرتے ہوئے حوالہ ہنڈی اور غیر قانونی کرنسی ایکسچینج میں ملوث 2 ملزمان کو گرفتار کرکے کروڑوں روپے مالیت کی غیر ملکی کرنسی برآمد کرلی۔

ایف آئی اے کارپوریٹ کرائم سرکل کراچی نے جناح انٹرنیشنل ائرپورٹ کی پارکنگ سے ملزمان اسامہ عابد اور محمود بٹ کو گرفتار کیا۔

ایف آئی اے کے مطابق ملزمان غیر قانونی کرنسی ایکسچینج میں ملوث ہیں، جن کے قبضہ سے 1 لاکھ ڈالر برآمد ہوئے، برآمد شدہ کرنسی کی مالیت 2 کروڑ 80 لاکھ روپے سے زائد ہے۔

ایف آئی اے کا کہنا ہے کہ ملزمان بغیر لائسنس کرنسی ایکسچینج کا کاروبار کر رہے تھے، ملزمان سے موبائل فونز، غیر قانونی کرنسی ایکسچینج سے متعلق شواہد برآمد کرلیے گئے۔ ملزمان سے مزید تفتیش شروع کردی گئی جبکہ ان کے دیگر ساتھیوں کی گرفتاری کے لیے چھاپے مارے جا رہے ہیں۔