چینی کی قیمت آسمان سے باتیں کرنے لگی، کیا آپ کا بجٹ محفوظ رہے گا؟

ملک کے مختلف شہروں میں چینی کی قیمتوں میں اضافہ دیکھا گیا ہے۔ حیدرآباد میں ہول سیل مارکیٹ میں فی کلو چینی کی قیمت 178 روپے سے بڑھ کر 180 روپے ہو گئی جبکہ ریٹیل مارکیٹ میں قیمت 185 روپے سے بڑھ کر 190 روپے فی کلو تک جا پہنچی ہے۔

فیصل آباد میں ہول سیل مارکیٹ میں 50 کلو بوری چینی کی قیمت 10,000 روپے تک پہنچ گئی اور دکانوں پر فی کلو 190 سے 200 روپے میں فروخت کی جا رہی ہے۔ انتظامیہ کی جانب سے مقررہ سرکاری قیمت 179 روپے ہے۔

کوئٹہ میں ہول سیل مارکیٹ میں چینی 205 روپے فی کلو اور دکانوں پر 210 سے 215 روپے فی کلو فروخت ہو رہی ہے جبکہ گزشتہ ہفتے یہ قیمت 190 روپے تھی۔

ملتان میں پرچون سطح پر چینی کی فی کلو قیمت 180 سے 190 روپے تک پہنچ گئی ہے جب کہ سرکاری ریٹ 172 روپے فی کلو ہے۔ غلہ منڈی میں 50 کلو چینی کا تھیلا 8,650 روپے میں دستیاب ہے۔

دوسری جانب پشاور میں چینی کی قیمت میں کمی دیکھی گئی ہے جہاں پرچون میں فی کلو چینی 180 روپے میں فروخت ہو رہی ہے دو روز قبل یہ قیمت 184 روپے تھی۔