وفاقی وزیر برائے بحری امور محمد جنید انوار چوہدری نے اعلان کیا ہے کہ پاکستان میں بنکرنگ کے لیے تاریخ کا پہلا لائسنس جاری کر دیا گیا ہے اور کراچی پورٹ پر پہلی عالمی معیار کی بنکرنگ سروس کا آغاز کر دیا گیا ہے۔
وفاقی وزیر نے بتایا کہ متعدد بین الاقوامی کمپنیوں نے بھی لائسنس کے لیے دلچسپی ظاہر کی ہے اور مستقبل میں پورٹس سے اربوں روپے کی آمدنی متوقع ہے۔
انہوں نے کہا کہ یہ سروس وزیراعظم کی خصوصی ہدایات پر شروع کی گئی ہے اور جہازوں کو بین الاقوامی معیار کا فیول سپلائی نظام دستیاب ہوگا۔محمد جنید انوار چوہدری نے کہا کہ عالمی معیار کی بنکرنگ سے کراچی پورٹ کی علاقائی مسابقت بڑھے گی منظم بنکرنگ سروسز سے غیر ملکی شپنگ لائنز کی آمد بڑھے گی اور آپریشنز سے قیمتی زرمبادلہ حاصل ہوگا۔
وفاقی وزیر کے مطابق کراچی پورٹ میں عالمی حفاظتی اور آپریشنل اسٹینڈرڈز نافذ کر دیے گئے ہیں نئی سروس سے مرمت، سپلائز اور میری ٹائم لاجسٹکس میں روزگار بڑھے گا جبکہ ایندھن کے معیار، دستاویزات اور شفافیت پر مکمل پابندی ہوگی۔