ایڈیشنل انسپکٹر جنرل پولیس کراچی جاوید عالم اوڈھو نے گاڑیوں اور موٹرسائیکلوں پر غیر قانونی اور جعلی نمبر پلیٹس لگانے والے شہریوں کو خبردار کردیا۔
اے آئی جی نے ایک بیان میں کہا کہ جعلی اور غیر قانونی نمبر پلیٹس کے خلاف بلا تفریق کارروائی کی جائے گی۔
کراچی پولیس چیف نے شہریوں کو 5 دسمبر کی ڈیڈ لائن دیتے ہوئے کہا کہ گاڑیوں اور موٹرسائیکلوں کی نمبر پلیٹس درست کروالیں، بصورت دیگر ان کی گاڑیاں ضبط کرلی جائیں گی۔
واضح رہے کہ سندھ میں اجرک والی نمبر پلیٹس کی ڈیڈ لائن 31 اکتوبر کو ختم ہوچکی ہے، جبکہ محکمہ ایکسائز کا کہنا ہے کہ سندھ بھر میں تقریباً 65 لاکھ موٹر سائیکلیں رجسٹرڈ ہیں صرف کراچی میں یہ تعداد 33 لاکھ سے تجاوز کرچکی ہے۔
علاوہ ازیں شہر میں ای چالان سسٹم فعال ہونے کے بعد انکشاف ہوا ہے کہ کئی شہریوں نے چالان سے بچنے کے لیے گاڑیوں اور موٹر سائیکلوں پر جعلی نمبر پلیٹس لگا دی ہیں۔