چیئرمین فیڈرل بورڈ آف ریونیو راشد محمود لنگڑیال نے کہا ہے کہ وزیراعظم شہباز شریف کی ہدایت پر تنخواہ دار طبقے کو ٹیکس ریلیف دینے کے لیے باضابطہ کام کا آغاز کر دیا گیا ہے۔
اسلام آباد میں پاکستان بزنس کونسل کے سیمینار سے خطاب کرتے ہوئے انہوں نے کہا کہ آئندہ مالی سال کے بجٹ میں تنخواہ دار افراد کے ٹیکس ریٹ کم کرنے کی تجاویز پر کام جاری ہے۔
راشد محمود لنگڑیال نے بتایا کہ وزیراعظم نے بڑی کمپنیوں پر عائد سپر ٹیکس میں مرحلہ وار کمی کی بھی ہدایت دی ہے جس پر حکومتی سطح پر مشاورت شروع ہو چکی ہے۔ ان کے مطابق وفاقی حکومت مستقبل میں سپر ٹیکس کے مکمل خاتمے پر بھی آمادہ ہے تاکہ ملک میں سرمایہ کاری کو فروغ دیا جا سکے۔
چیئرمین ایف بی آر کا کہنا تھا کہ سپر ٹیکس میں ممکنہ کمی اور خاتمے کے حوالے سے آئی ایم ایف سے بھی مشاورت کی جائے گی۔ انہوں نے واضح کیا کہ ٹیکس ریٹ کم کرنے کا انحصار ٹیکس کمپلائنس اور ٹیکس دہندگان کی تعداد بڑھانے پر ہوگا۔ان کا کہنا تھا کہ جتنے زیادہ لوگ ٹیکس نیٹ میں آئیں گے، اتنا ہی ٹیکس ریٹ کم کیا جا سکے گا۔