پشاور میں بائیک سروس کی آڑ میں راہزنی کی وارداتوں کا انکشاف ہوا ہے، جس کے بعد پولیس نے تمام آن لائن بائیک رائیڈرز کی رجسٹریشن لازمی قرار دے دی ہے۔
پولیس ذرائع کے مطابق ملزمان بائیک سروس فراہم کرنے والوں کا روپ دھار کر شہریوں کا اعتماد حاصل کرتے ہیں اور مناسب موقع ملتے ہی انہیں لوٹ کر فرار ہو جاتے ہیں۔
اس صورتحال کے پیشِ نظر خیبر پختونخوا پولیس نے خصوصی موبائل ایپ بھی تیار کی ہے جس کی تفصیلات جلد عوام کے لیے جاری کی جائیں گی۔
ایس ایس پی آپریشنز پشاور فرحان خان نے بتایا کہ اسٹریٹ کرائم کی روک تھام کیلیے آن لائن بائیک رائیڈرز کی تھانوں میں باضابطہ رجسٹریشن کا فیصلہ کیا گیا ہے۔ ان کے مطابق اس اقدام کا مقصد شہریوں کے اعتماد اور سیکیورٹی کو یقینی بنانا ہے۔ ایس ایس پی آپریشنز نے مزید بتایا کہ متعدد وارداتوں میں بائیک رائیڈرز ہی شہریوں کو لوٹنے میں ملوث پائے گئے، جبکہ اب تک 20 سے زائد آن لائن رائیڈرز کو گرفتار کیا جا چکا ہے۔