فیڈرل بورڈ آف ریونیو (ایف بی آر) نے ٹریک اینڈ ٹریس (TTS) سسٹم کو مزید شعبوں تک بڑھانے کا فیصلہ کیا ہے۔ ابتدائی طور پر چینی، سگریٹ، کھاد اور سیمنٹ کی صنعت میں کامیاب ہونے کے بعد اب یہ نظام اسٹیل، فارماسیوٹیکلز، مصالحہ جات، بسکٹ اور دیگر پیک شدہ مصنوعات پر بھی نافذ کیا جائے گا۔
ایف بی آر ذرائع کے مطابق ٹریک اینڈ ٹریس سسٹم کے ذریعے منفرد شناختی نشانات کے تحت اربوں روپے کی ٹیکس چوری روکنے میں کامیابی حاصل ہوئی ہے۔ ریگولیٹری ماہرین کے مطابق یہ نظام غیر قانونی مصنوعات کی خرید و فروخت، ٹیکس چوری اور پیداوار کے درست ڈیٹا کی نگرانی میں مؤثر ثابت ہوا ہے۔ حالیہ عرصے میں غیر قانونی تمباکو، شوگر اور دیگر اشیاء کے خلاف سخت کارروائیاں کی گئی ہیں، کئی شوگر ملوں کی پیداواری یونٹ کو TTS کی مہر نہ لگانے پر سیل کیا گیا جبکہ کروڑوں روپے مالیت کی غیر قانونی سگریٹ ضبط کی گئی۔
ماہرین کے مطابق TTS اب ملک گیر الیکٹرانک مانیٹرنگ فریم ورک کی شکل اختیار کر چکا ہے، جو پیداواری مرحلے سے لے کر ریٹیل آؤٹ لیٹس تک مصنوعات کی حقیقی وقت میں نگرانی ممکن بناتا ہے۔ شناختی نشانات پوری سپلائی چین میں چھیڑ چھاڑ سے محفوظ رہتے ہیں، جس سے قوانین کی پاسداری، دستاویزات اور آڈٹ کے عمل میں بہتری آئی اور اربوں روپے کی ٹیکس چوری روکی گئی۔
ماہرین کا کہنا ہے کہ جب مصنوعات قابلِ سراغ ہوں تو ٹیکس وصولی بہتر ہوتی ہے، مارکیٹ منصفانہ بنتی ہے اور محصولات کے ضیاع کو منظم طور پر ختم کیا جا سکتا ہے۔