بلوچستان کے ضلع چاغی میں تانبے اور سونے کے نئے ذخائر دریافت ہونے کا انکشاف ہوا ہے۔ یہ اہم دریافت ریکوڈک منصوبے سے تقریباً 50 کلومیٹر مشرق میں واقع ایسٹ سیاہ دق کے علاقے میں ہوئی ہے۔
ماڑی انرجیز نے اس حوالے سے پاکستان اسٹاک ایکسچینج کو باضابطہ خط کے ذریعے آگاہ کردیا۔ خط کے مطابق معدنی ذخائر کی دریافت کمپنی کی ذیلی کمپنی ماڑی منرلز نے کی ہے۔ یہ مقام نوکنڈی سے تقریباً 25 کلومیٹر شمال مغرب میں واقع ہے۔
خط میں بتایا گیا ہے کہ ایسٹ سیاہ دق ون کے مقام پر مجموعی طور پر 25 ہزار میٹر تک ڈرلنگ مکمل کی گئی، جبکہ تمام ڈرل ہولز 500 میٹر طویل اور عمودی ہیں۔ نمونوں کی تیاری اور جانچ کا عمل ایس جی ایس پاکستان نے انجام دیا۔
ابتدائی نتائج کے مطابق تقریباً 100 میٹر گہرائی میں پورفیری کاپر طرز کی معدنیات کے شواہد ملے ہیں، جو تقریباً 1.4 مربع کلومیٹر کے رقبے پر پھیلی ہوئی ہیں۔
ماڑی انرجیز کے مطابق ابتدائی نتائج اس مقام پر پورفیری کاپر کے ایک نئے ذخیرے کی دریافت کی نشاندہی کرتے ہیں، جس سے بلوچستان میں معدنی وسائل کی تلاش کے حوالے سے اہم پیشرفت سامنے آئی ہے۔