بین الاقوامی جریدہ گلف نیوز نے پاکستانی چاول کی عالمی سطح پر پذیرائی پر مہر ثبت کر دی ہے۔ عرب میڈیا کے مطابق 2026 کے آغاز پر پاکستان دنیا کا تیسرا بڑا چاول برآمد کنندہ ملک بن گیا ہے۔
دسمبر 2025 میں پاکستانی چاول کی برآمدات میں ماہانہ 14 فیصد اضافہ ریکارڈ کیا گیا جس میں باسمتی چاول کی برآمدات میں 50 فیصد سے زائد اضافہ اہم کردار ادا کر رہا ہے۔ دسمبر میں پاکستان نے 4 لاکھ 89 ہزار ٹن چاول عالمی منڈیوں میں برآمد کیے جبکہ ویتنام کی برآمدات 3 لاکھ 87 ہزار ٹن رہیں۔
عرب میڈیا کے مطابق پاکستان نے ویتنام کو پیچھے چھوڑ کر عالمی درجہ بندی میں تیسری پوزیشن حاصل کی۔ سب سے زیادہ چاول یو اے ای، چین، تنزانیہ، کینیا اور آئیوری کوسٹ کو برآمد کیا گیا۔