فیڈرل بورڈ آف ریونیو نے لگژری گاڑیوں کی درآمد پر انڈر انوائسنگ اور ٹیکس چوری کو روکنے کے لیے اہم قدم اٹھایا ہے۔ نئے قواعد کے تحت اب مقامی مجاز ایجنٹس کی گاڑی کی قیمتیں سرٹیفائی کرنے میں مداخلت ختم کر دی گئی ہے۔
گزشتہ طریقہ کار میں درآمد کنندگان کو گاڑی کی قیمت سرٹیفائی کروانے کے لیے مقامی ایجنٹس یا ڈیلرز سے رابطہ کرنا پڑتا تھا اور اضافی فیس بھی دینی پڑتی تھی۔ اب گاڑیوں کی قیمتیں براہِ راست متعلقہ مینوفیکچرنگ کمپنی سے سرٹیفائی ہوں گی جس سے ٹیکس کی شفاف وصولی کو یقینی بنایا جائے گا۔
ایف بی آر حکام کا کہنا ہے کہ یہ نظام درآمد کنندگان کے لیے سہولت کا باعث ہوگا اور خاص طور پر یورپی لگژری گاڑیوں اور مہنگی استعمال شدہ گاڑیوں کی درآمد پر اثر انداز ہوگا۔ یہ اقدام درآمدی عمل میں خلا کو ختم کرنے اور ریونیو کلیکشن مضبوط کرنے کے ایف بی آر کے مشن کا حصہ ہے۔