وزیراعظم محمد شہباز شریف نے پاکستان انٹرنیشنل ایئر لائنز کی نجکاری کے عمل کے شفاف مکمل ہونے پر اطمینان کا اظہار کرتے ہوئے کہا کہ نجکاری کے بعد پی آئی اے کی عظمت رفتہ رفتہ بحال ہوگی اور عوام کو بہترین سفری سہولیات فراہم ہوں گی، جبکہ پاکستان کا نام بھی بلند ہوگا۔
جمعرات کو اسلام آباد میں حکومت اور عارف حبیب کنسورشیم کے درمیان نجکاری کی ٹرانزیکشن دستاویزات پر دستخط و تبادلے کی تقریب منعقد ہوئی۔ اس موقع پر نائب وزیراعظم و وزیر خارجہ محمد اسحاق ڈار، وزیر دفاع خواجہ محمد آصف، وفاقی وزیر اطلاعات و نشریات عطاء اللہ تارڑ، چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر، وزیراعظم کے مشیر محمد علی اور دیگر اعلیٰ حکام موجود تھے۔
وزیراعظم نے تقریب سے خطاب کرتے ہوئے کہا کہ آج کی تقریب تاریخی اہمیت کی حامل ہے اور قوم کو مبارکباد پیش کرتے ہیں۔ انہوں نے کہا کہ پی آئی اے کی نجکاری کا عمل شفاف انداز میں بخوبی انجام پایا اور یہ توقع رکھتے ہیں کہ نجکاری کے بعد ادارہ مسافروں کے آرام، تحفظ اور وقار کو یقینی بنائے گا۔
چیئرمین عارف حبیب کنسورشیم نے کہا کہ 180 ارب روپے کی سرمایہ کاری میں سے 125 ارب روپے پی آئی اے کی بہتری پر خرچ ہوں گے، جس سے خدمات، عملے کی بہبود اور ٹیکس آمدن میں اضافہ ہوگا۔ انہوں نے یقین دلایا کہ کنسورشیم حکومت اور عوام کی توقعات پر پورا اترے گا اور پی آئی اے کی عظمت رفتہ کو بحال کرے گا۔
وزیراعظم کے مشیر نجکاری محمد علی نے بتایا کہ نجکاری کے بعد 55 ارب روپے حکومتی خزانے میں جمع ہوں گے اور اس عمل سے ملک میں سرمایہ کاری کے فروغ اور اقتصادی استحکام میں مدد ملے گی۔