پاکستان میں پیٹرولیم مصنوعات کے حوالے سے پیدا ہونے والے تمام خدشات غلط ثابت ہو گئے ہیں۔ تفصیلات کے مطابق 24 سے 72 گھنٹے کے دوران چار جہازوں کی پاکستان آمد و روانگی کنفرم ہو گئی ہے جن میں مجموعی طور پر پونے دو لاکھ میٹرک ٹن سے زائد تیل پہنچایا جائے گا۔ اسٹریٹ آف ہرموز کو بائی پاس کرکے ریڈ سی و دیگر راستوں سے سعودیہ،کویت اور سنگاپور سے تیل منگوایا گیا ہے۔
پورٹ قاسم پر تیل سے بھرے جہازوں کی آمد شروع ہو گئی ہے جس کے بعد ملک میں پیٹرولیم مصنوعات کا ذخیرہ تقریباً 30 دن تک کافی رہے گا۔
ایم ٹی ناوے ایٹروپوس نامی جہاز 50 ہزار میٹرک ٹن تیل، 9 مارچ کو پورٹ قاسم پہنچ گیا جبکہ 55,000 میٹرک ٹن تیل 10 مارچ رات 8 بج کر 30 منٹ پر لنگر انداز ہو گا اور 34,000 میٹرک ٹن تیل، 11 مارچ دوپہر 12 بجے پہنچے گا۔
اس کے علاوہ فجیرہ سے آنے والا ایک جہاز پورٹ قاسم پہلے ہی پہنچ چکا ہے۔ حکام کے مطابق پیٹرول کی سپلائی کے لیے مزید جہازوں کی آمد بھی متوقع ہے جس سے ملک بھر میں تیل کی دستیابی میں کوئی خلل نہیں آئے گا۔