پیٹرولیم مصنوعات کی بلا تعطل فراہمی کو یقینی بنانے کے لیے اسٹیٹ بینک آف پاکستان نے اہم فیصلہ کرتے ہوئے آئل امپورٹس میں عارضی نرمی کا اعلان کر دیا ہے۔
سرکلر کے مطابق درآمد کنندگان کو 60 دن تک کاسٹ، انشورنس اور فریٹ (CIF) کی بنیاد پر تیل درآمد کرنے کی اجازت دی گئی ہے۔ اسٹیٹ بینک نے مجاز ڈیلرز اور بینکوں کو ہدایت کی ہے کہ وہ اس نئی پالیسی پر فوری عمل درآمد کریں اور تمام صارفین و درآمد کنندگان کو آگاہ کریں۔
اسٹیٹ بینک کے حکام کے مطابق یہ فیصلہ موجودہ عالمی جغرافیائی کشیدگی اور لاجسٹکس و انشورنس خطرات کے پیش نظر کیا گیا تاکہ ملکی سطح پر پیٹرولیم مصنوعات کی فراہمی میں رکاوٹ نہ آئے۔
سرکلر میں کہا گیا کہ یہ عارضی نرمی درآمد کنندگان کو لاجسٹکس اور انشورنس کے مسائل کم کرنے میں مدد دے گی اور مارکیٹ میں تیل کی دستیابی کو مستحکم رکھے گی۔