اسلام آباد یونائیٹڈ کے کھلاڑی ڈیون کانوے نے میڈیا سے گفتگو کرتے ہوئے کہا ہے کہ وہ اپنے پہلے پی ایس ایل سیزن کے لیے انتہائی پرجوش ہیں اور ان کی ٹیم کی تیاریاں بہت اچھی سمت میں جا رہی ہیں۔
انہوں نے بتایا کہ اسلام آباد یونائیٹڈ کا گروپ بہت متوازن ہے اور ان کا یہاں پہلا تجربہ ہونے کے ناطے وہ اچھے نتائج کے لیے پرامید ہیں۔
ڈیون کانوے کا کہنا تھا کہ کسی بھی ایک لیگ کا دوسری لیگ سے مقابلہ کرنا مشکل کام ہے، تاہم پاکستان میں فاسٹ بولرز کا سامنے آنا لیگ کے لیے ایک مثبت پہلو ہے اور ٹاپ آرڈر بلے باز کے طور پر ایسے معیاری بولرز کا سامنا کرنا ایک اچھا چیلنج ہوتا ہے۔
انہوں نے دو مختلف وینیوز پر میچز کھیلنے کو ایک مختلف تجربہ قرار دیا اور کہا کہ اگرچہ اسٹیڈیم میں کراؤڈ کو مس کریں گے لیکن اس کا کھلاڑیوں کی کارکردگی پر کوئی اثر نہیں پڑے گا۔
ان کا مزید کہنا تھا کہ ٹیم کی بھرپور کوشش ہے کہ ایک یونٹ کے طور پر اچھا کھیل پیش کریں اور چیمپئن بننے کے سفر میں آگے بڑھیں۔