لاہور قلندرز کے وکٹ کیپر بیٹر حسیب اللہ کا کہنا ہے کہ وہ دو مختلف فرنچائزز سے کھیل چکے ہیں لیکن لاہور قلندرز کا ماحول بالکل منفرد ہے، جہاں کپتان، مالکان اور فخر زمان جیسے سینیئر کھلاڑی بہت زیادہ سپورٹ کرتے ہیں۔
انہوں نے اتنی بڑی فرنچائز کا حصہ بننے پر فخر کا اظہار کرتے ہوئے کہا کہ وہ ایک کھلاڑی کے طور پر ہمیشہ مثبت سوچ رکھتے ہیں اور ٹیم جہاں بھی موقع دے گی، وہ نئے اور پرانے دونوں گیندوں سے اپنی بہترین کارکردگی دکھانے کے لیے تیار ہیں۔
حسیب اللہ نے کھلاڑیوں کو ملنے والے مواقع پر بات کرتے ہوئے کہا کہ کسی بھی کھلاڑی کو صرف ایک میچ کی بنیاد پر کئی ماہ کے لیے باہر نہیں کرنا چاہیے، بلکہ اسے مستقل بنیادوں پر پورا موقع ملنا چاہیے۔
انہوں نے قومی ٹیم کی مثال دیتے ہوئے کہا کہ وہاں ایک میچ میں پرفارمنس نہ آنے پر 17، 18 میچوں کے لیے باہر بٹھا دیا جاتا ہے، جو درست نہیں۔
حسیب اللہ کا مزید کہنا تھا کہ تمام وکٹ کیپرز اپنی محنت کر رہے ہیں لیکن وہ صرف اپنی بہتری پر توجہ دیتے ہیں، جبکہ نیشنل ٹی ٹوئنٹی میں کوئٹہ کے ریجن سے کھیل کر انہیں بہت اچھا محسوس ہوا۔