گلگت بلتستان کے علاقے چیلاس میں پولیس ٹیم پر فائرنگ کے نتیجے میں 3 اہلکار شہید جبکہ ڈی ایس پی سمیت متعدد اہلکار زخمی ہو گئے۔
اسسٹنٹ کمشنر کے مطابق واقعہ تھور گوئیں کے مقام پر اس وقت پیش آیا جب پولیس ٹیم علاقے میں افیون کی فصل تلف کرنے میں مصروف تھی کہ نامعلوم ملزمان نے اچانک فائرنگ کر دی۔
فائرنگ کے نتیجے میں تین اہلکار موقع پر شہید ہو گئے جبکہ ڈی ایس پی اور دیگر زخمی اہلکاروں کو فوری طور پر قریبی اسپتال منتقل کر دیا گیا ہے۔
واقعے کے بعد پولیس نے علاقے کو گھیرے میں لے کر سرچ آپریشن شروع کر دیا ہے جبکہ نامعلوم ملزمان کے خلاف مقدمہ درج کر کے ان کی تلاش بھی تیز کر دی گئی ہے۔