بچوں کے حقوق کے تحفظ کے لیے کام کرنے والی غیرسرکاری تنظیم سوسائٹی فار دی پروٹیکشن آف دی رائٹس آف دی چائلڈ (سپارک) نے آئندہ مالی سال 27-2026 کے وفاقی بجٹ میں سگریٹ پر فیڈرل ایکسائز ڈیوٹی (ایف ای ڈی) بڑھانے کی تجویز دے دی ہے۔
تنظیم کی سفارشات کے مطابق سگریٹ پر ٹیکس میں اضافے سے قومی خزانے کو تقریباً 51 ارب روپے تک اضافی آمدن حاصل ہو سکتی ہے۔ تجویز میں کہا گیا ہے کہ کم قیمت سگریٹ کے پیکٹ پر کم از کم 35 روپے اور مہنگے سگریٹ کے پیکٹ پر 21 روپے تک اضافہ کیا جائے۔
سپارک نے یہ بھی سفارش کی ہے کہ سگریٹ پر یکساں ٹیکس نظام کی طرف مرحلہ وار پیش رفت کی جائے تاکہ قیمتوں میں فرق کم ہو اور تمباکو مصنوعات کی دستیابی محدود کی جا سکے۔
ماہرین کے مطابق ان اقدامات سے نہ صرف حکومتی ریونیو میں اضافہ ہوگا بلکہ نوجوانوں میں سگریٹ نوشی کے رجحان میں بھی کمی آئے گی۔ اندازوں کے مطابق تقریباً 3 لاکھ 70 ہزار نوجوان سگریٹ نوشی سے محفوظ رہ سکتے ہیں جبکہ 2 لاکھ 70 ہزار افراد کے اس عادت کو ترک کرنے کے امکانات بھی بڑھ جائیں گے۔