فرانس میں پولیس نے گاڑی چلانے والوں کو خبردار کیا ہے کہ نشہ آور پھل کھانے والے جنگلی جانور سڑکوں پر خطرناک صورتحال پیدا کر سکتے ہیں۔
سون اے لوار ژوندرمری کی جانب سے سوشل میڈیا پر جاری ویڈیو میں ایک ہرن کو نشہ آور پھل کھانے کے بعد مدہوش حالت میں گول گول گھومتے دیکھا گیا، جس کی ویڈیو تیزی سے وائرل ہو رہی ہے۔
پولیس نے ویڈیو کے ساتھ دلچسپ کیپشن بھی شیئر کیا کہ سبھی روڈ استعمال کرنے والے ہوش میں نہیں ہوتے۔
ژوندرمری کے مطابق ہرن اور دیگر جنگلی جانور سڑے ہوئے پھل یا پودے کھانے کے بعد نشے جیسی کیفیت میں مبتلا ہو سکتے ہیں جس کے باعث ان کا رویہ غیر متوقع ہو جاتا ہے۔پولیس نے ڈرائیورز کو ہدایت کی ہے کہ سڑک پر اچانک آنے والے جنگلی جانوروں سے محتاط رہیں تاکہ کسی حادثے سے بچا جا سکے۔