امریکی ریاست آئیڈاہو کے رہائشی رابرٹ بیون نے 18 ویں بار لاٹری جیت کر ایک بار پھر لوگوں کو حیران کر دیا۔غیر ملکی میڈیا رپورٹس کے مطابق رابرٹ بیون نے حال ہی میں ’1,000,000 کنگ اسکریچ گیم‘ میں 50 ہزار ڈالر کا انعام حاصل کیا۔
آئیڈاہو لاٹری حکام کے مطابق رابرٹ بیون کی خوش قسمتی کا سلسلہ 1997 میں شروع ہوا تھا جب انہوں نے ایک خصوصی پروموشن کے دوران شیورلے بلیزر گاڑی جیتی تھی۔ اس کے بعد وہ مختلف اوقات میں متعدد انعامات اپنے نام کر چکے ہیں جن میں 2 لاکھ ڈالر تک کی بڑی رقم بھی شامل ہے۔
رابرٹ بیون کا کہنا ہے کہ لاٹری کھیلنا ہمیشہ ان اور ان کی اہلیہ کے لیے صرف تفریح رہا ہے اور دونوں کئی برسوں سے مل کر ٹکٹ خریدتے آ رہے ہیں۔
جب حکام نے ان سے مسلسل کامیابی کا راز پوچھا تو انہوں نے جذباتی انداز میں کہا کہ ان کی اصل خوش قسمتی 40 سال تک ایک ہی ذہین اور شاندار خاتون کے ساتھ زندگی گزارنا ہے۔
ان کے اس بیان نے سوشل میڈیا صارفین کے دل جیت لیے جبکہ صارفین ان کی محبت اور وفاداری کو خوب سراہ رہے ہیں۔
آئیڈاہو لاٹری حکام کے مطابق لاٹری ٹکٹوں سے حاصل ہونے والی رقم ریاست کے سرکاری اسکولوں اور عمارتوں کی تعمیر و ترقی پر خرچ کی جاتی ہے۔