قازقستان کے سرکاری وفد کے بعد چین کے صوبہ شنگڈونگ سے تعلق رکھنے والے ایک اعلیٰ سطح کے سرکاری و تجارتی وفد نے کراچی پورٹ ٹرسٹ (کے پی ٹی) کا دورہ کیا، جہاں انہوں نے بحری تعاون کے باہمی مواقع کا تفصیلی جائزہ لیا۔
کراچی پورٹ آمد پر وفد کا شاندار استقبال چیئرمین کے پی ٹی ریئر ایڈمرل شاہد احمد اور ریئر ایڈمرل کاشف منیر نے کیا۔ اس موقع پر چینی وفد کو کراچی بندرگاہ کے روزمرہ آپریشنز اور مستقبل کے اہم ترقیاتی منصوبوں پر تفصیلی بریفنگ دی گئی۔ وفد کو منوڑہ ورکشاپ کے توسیعی منصوبے کے تحت فراہم کی جانے والی مختلف بحری سہولیات سے بھی آگاہ کیا گیا، جن میں گریونگ ڈاک، سلپ وے، فلوٹنگ ڈاک اور تربیتی مراکز شامل ہیں۔
دورانِ گفتگو چیئرمین کے پی ٹی ریئر ایڈمرل شاہد احمد نے کراچی بندرگاہ کی اسٹریٹیجک اہمیت پر روشنی ڈالتے ہوئے بتایا کہ 400 ملین ڈالر سے کم لاگت کا یہ توسیعی منصوبہ تمام بحری اداروں کے لیے انتہائی فائدہ مند ثابت ہوگا۔ انہوں نے مزید امید ظاہر کی کہ اس منصوبے کی تکمیل سے ملکی بحری صنعت اور شپ ریپئرنگ (جہازوں کی مرمت) کے شعبے کو زبردست فروغ ملے گا۔