پاکستان شوبز انڈسٹری کے معروف اداکار فیصل قریشی نے اپنے ننھے بیٹے فرمان قریشی سے جڑا ایک ایسا واقعہ شیئر کیا ہے جس نے سوشل میڈیا صارفین کو بھی جذباتی کر دیا۔ فیصل قریشی نے بتایا کہ گزشتہ عیدالاضحیٰ پر ان کا بیٹا قربانی کے جانور کے ساتھ اس قدر گھل مل گیا تھا کہ وہ اس کا بہترین دوست بن چکا تھا۔
"فرمان نے اپنی امی سے کہا کہ پولیس کو بلاؤ، بابا نے میرے دوست کو کاٹ دیا… وہ پچھلے سال قربانی کے بعد بہت زیادہ پریشان ہوگیا تھا۔ اسی لیے اس بار میں پورا جانور گھر نہیں لا رہا کیونکہ وہ ابھی بہت چھوٹا ہے اور قربانی کو پوری طرح سمجھ نہیں پاتا۔"
اداکار کے مطابق فرمان ہر وقت جانور کے ساتھ کھیلتا رہتا تھا، اسے کھانا کھلاتا اور اس کے ساتھ وقت گزارتا تھا۔ ننھے فرمان کو یہ اندازہ ہی نہیں تھا کہ چند دن بعد اسی جانور کی قربانی دی جائے گی۔ جب قربانی کا وقت آیا تو وہ یہ منظر دیکھ کر شدید صدمے میں چلا گیا۔
فیصل قریشی نے بتایا کہ ان کے بیٹے نے روتے ہوئے اپنی والدہ سے کہا کہ پولیس کو بلایا جائے کیونکہ اس کے والد نے اس کے دوست کو مار دیا ہے۔ اداکار نے کہا کہ اس لمحے انہیں احساس ہوا کہ چھوٹے بچوں کے لیے قربانی کے تصور کو سمجھنا آسان نہیں ہوتا۔
فیصل قریشی نے مزید بتایا کہ اسی وجہ سے انہوں نے اس بار فیصلہ کیا ہے کہ پورا قربانی کا جانور گھر نہیں لائیں گے تاکہ فرمان دوبارہ جذباتی طور پر اس سے اتنا منسلک نہ ہو جائے۔ اداکار کی یہ بات سن کر سوشل میڈیا صارفین بھی ننھے فرمان کی معصومیت پر دلچسپ اور جذباتی تبصرے کر رہے ہیں۔