پاکستانی ٹیلی ویژن کی معروف اداکارہ مومنہ اقبال کی شادی کی تقریبات سوشل میڈیا پر توجہ کا مرکز بنی ہوئی ہیں جہاں ان کے مختلف ایونٹس کے فوٹو شوٹس مداحوں کی جانب سے خوب پسند کیے جا رہے ہیں۔
اداکارہ کی جانب سے دعا خیر، مہندی اور دیگر تقریبات کی جھلکیاں پہلے ہی سامنے آ چکی تھیں، تاہم اب ان کے نکاح کی تصاویر نے سوشل میڈیا پر دھوم مچا دی ہے۔
نکاح کی تقریب لاہور میں منعقد ہوئی جس میں مومنہ اقبال نے ڈل گولڈن رنگ کا خوبصورت اور مکمل کڑھائی سے مزین لہنگا زیب تن کیا۔ انہوں نے چولی اور ہم رنگ بھاری دوپٹہ کے ساتھ اضافی رسٹ رنگ کا دوپٹہ بھی اوڑھا ہوا تھا جس پر لیس اور گوٹا کا نفیس کام کیا گیا تھا۔
اداکارہ نے اپنے برائیڈل لک کو روایتی جیولری سے مکمل کیا، جس میں ناتھ، ٹیکا، جھومر، بھاری گولڈ چوکر، ہار اور کنگن شامل تھے۔ دوسری جانب ان کے شوہر حمزہ حبیب نے سفید کلاسک شیروانی اور روایتی سفید و گولڈ کلہ زیب تن کیا۔
نکاح تصاویر سامنے آتے ہی مداحوں کی جانب سے جوڑی کو نیک تمناؤں اور دعاؤں سے نوازا جا رہا ہے جبکہ مومنہ اقبال کا برائیڈل لک سوشل میڈیا پر ٹرینڈ کر رہا ہے۔