کراچی میں حکومت سندھ نے میٹرک اور انٹرمیڈیٹ کے نتائج کی تاریخوں کا اعلان کر دیا ہے۔وزیر جامعات و تعلیمی بورڈز اسماعیل راہو کی زیر صدارت تمام تعلیمی بورڈز کا اجلاس ہوا جس میں سندھ بھر میں میٹرک اور انٹرمیڈیٹ کے سالانہ امتحانات اور نتائج کی تیاریوں کا تفصیلی جائزہ لیا گیا۔
اجلاس کے دوران تمام تعلیمی بورڈز نے اپنے اپنے ڈویژنز میں منعقدہ امتحانات سے متعلق وزیر کو بریفنگ دی۔
اجلاس میں اسماعیل راہو نے اعلان کیا کہ سندھ کے تمام ڈویژنز میں میٹرک کے نتائج 10 جولائی تک جبکہ انٹرمیڈیٹ کے نتائج 31 جولائی تک جاری کر دیے جائیں گے۔ انہوں نے کہا کہ نتائج مقررہ وقت پر جاری کرنا طلبہ کے داخلوں اور تعلیمی منصوبہ بندی کے لیے انتہائی اہم ہے۔
انہوں نے مزید کہا کہ حکومت تعلیمی بورڈز میں شفافیت، میرٹ اور امتحانی نظام کی بہتری کے لیے ہر ممکن تعاون فراہم کرے گی۔
دوران اجلاس بتایا گیا کہ نویں اور گیارہویں جماعت کے نتائج 31 اگست تک جاری کیے جائیں گے۔