"میں نے اپنے شوہر کے خلاف کوئی بات نہیں کی۔ حارث کو چاہیے کہ دوسروں کی باتوں پر یقین کرنے کے بجائے خود سوچیں اور میرے گھر آکر مجھ سے بات کریں تاکہ ہم بیٹھ کر اپنے مسائل حل کر سکیں۔ سوشل میڈیا پر ذاتی معاملات کو اچھالنے سے گریز کرنا چاہیے۔ میں اس رشتے کو بچانے کے لیے پہلے بھی جھک چکی ہوں لیکن ایسی بات پر معافی نہیں مانگ سکتی جو میں نے کہی ہی نہیں۔ نہ مجھے طلاق کا کوئی نوٹس ملا ہے اور نہ ہی ہمارا رشتہ ختم ہو رہا ہے، ہم جلد اپنے اختلافات حل کر لیں گے۔ میں یوٹیوبرز سے بھی درخواست کرتی ہوں کہ میری طلاق سے متعلق سنسنی خیز تھمب نیلز بنانا بند کریں کیونکہ ایک تھمب نیل بھی کسی کی زندگی تباہ کر سکتا ہے۔"
میڈیا پرسنالٹی اور ماہرِ نفسیات ڈاکٹر نبیہا علی خان ایک بار پھر خبروں میں ہیں۔ مردوں کے حق میں اپنے منفرد مؤقف اور بے باک اندازِ گفتگو کی وجہ سے شہرت حاصل کرنے والی نبیہا علی خان کی ذاتی زندگی بھی گزشتہ کچھ عرصے سے مسلسل زیرِ بحث رہی ہے۔ انہوں نے اپنے دیرینہ دوست حارث کھوکھر سے شادی کی تھی، تاہم شادی کے بعد سے ہی دونوں کے تعلقات میں کشیدگی کی خبریں سامنے آتی رہی ہیں اور حالیہ دنوں میں دونوں کے الگ رہنے کی اطلاعات بھی گردش کر رہی تھیں۔
حال ہی میں ایک پروگرام کے دوران میزبان فریحہ فاروق نے ڈاکٹر نبیہا علی خان سے ان کی زندگی کی سب سے بڑی غلطی کے بارے میں سوال کیا۔ نبیہا نے اس سوال کا براہِ راست جواب دینے سے گریز کیا جس پر میزبان نے اندازہ لگایا کہ شاید وہ اپنی شادی کو سب سے بڑی غلطی سمجھتی ہیں۔ اس موقع پر نبیہا صرف مسکرا دیں، لیکن ان کی یہی مسکراہٹ بعد میں ایک نئی بحث کا سبب بن گئی۔
دوسری جانب حارث کھوکھر کی بعض تلخ گفتگوؤں اور انٹرویوز کے بعد سوشل میڈیا پر یہ افواہیں زور پکڑ گئیں کہ انہوں نے اپنی اہلیہ کو طلاق کا نوٹس بھجوا دیا ہے۔ ان خبروں نے مداحوں میں تشویش پیدا کر دی اور مختلف یوٹیوب چینلز پر بھی اس حوالے سے متعدد دعوے کیے جانے لگے۔
ان تمام افواہوں کے بعد ڈاکٹر نبیہا علی خان نے اپنے یوٹیوب چینل پر تفصیلی وضاحت پیش کی۔ انہوں نے واضح الفاظ میں کہا کہ طلاق کے نوٹس سے متعلق خبریں بے بنیاد ہیں اور ان کے اور حارث کے درمیان معاملات اتنے خراب نہیں جتنے سوشل میڈیا پر دکھائے جا رہے ہیں۔ ان کا کہنا تھا کہ اختلافات ہر رشتے کا حصہ ہوتے ہیں لیکن انہیں عوامی تماشہ بنانا مسئلے کا حل نہیں۔
ڈاکٹر نبیہا نے اس امید کا بھی اظہار کیا کہ وہ اور حارث جلد اپنے اختلافات ختم کرکے دوبارہ ایک بہتر تعلق قائم کرنے میں کامیاب ہو جائیں گے۔ ان کے اس بیان کے بعد سوشل میڈیا پر جاری قیاس آرائیوں کو نئی بحث مل گئی ہے اور مداح اب اس جوڑے کے مستقبل کے بارے میں مختلف آراء کا اظہار کر رہے ہیں۔