"یہ میری پوتی ہے، اور آج کے بعد اگر کسی نے اس کی طرف بری نظر سے دیکھا یا اس کے بارے میں نامناسب بات کی تو یاد رکھیں، اس کے سر پر اس کے دادا مفتی عبدالقوی کا ہاتھ ہے۔ اپنے خیالات درست رکھیں۔ نوجوانوں کے لیے میرا صرف ایک ہی پیغام ہے کہ مثبت سوچ اپنائیں اور اپنی زبان کو شائستہ رکھیں۔ اگر آئندہ کسی نے میری پوتی کے بارے میں غلط بات کی یا نامناسب الفاظ استعمال کیے تو پھر مجھے بھی جواب دینا آتا ہے۔"
مختلف تنازعات کی وجہ سے اکثر خبروں میں رہنے والے مفتی عبدالقوی ایک بار پھر سوشل میڈیا کی توجہ کا مرکز بن گئے ہیں۔ اس بار وجہ ایک وائرل ویڈیو بنی ہے جس میں وہ معروف سوشل میڈیا انفلوئنسر فریحہ فرخ کے ساتھ نظر آرہے ہیں۔
ویڈیو سامنے آنے کے بعد سوشل میڈیا پر قیاس آرائیوں اور تبصروں کا سلسلہ شروع ہو گیا، جس پر مفتی قوی نے خود وضاحت دیتے ہوئے فریحہ فرخ کو اپنی "پوتی" قرار دیا۔ ویڈیو میں وہ نہ صرف ان کے لیے اپنے تحفظ اور حمایت کا اظہار کرتے دکھائی دیے بلکہ سوشل میڈیا صارفین کو تنبیہ بھی کی کہ وہ فریحہ کے بارے میں غیر مناسب گفتگو سے گریز کریں۔
مفتی قوی نے گفتگو کے دوران نوجوان نسل کو بھی مخاطب کیا اور کہا کہ معاشرے میں مثبت سوچ اور مہذب گفتگو کو فروغ دینا وقت کی اہم ضرورت ہے۔ تاہم ان کا انداز کافی سخت تھا جس کی وجہ سے ویڈیو نے مزید توجہ حاصل کرلی۔
ویڈیو وائرل ہوتے ہی سوشل میڈیا پلیٹ فارمز پر دلچسپ ردعمل دیکھنے میں آیا۔ کچھ صارفین نے مفتی قوی کے بیان کو مزاحیہ انداز میں لیا، جبکہ بعض نے فریحہ فرخ اور مفتی قوی کے تعلق سے متعلق مزید سوالات اٹھائے۔ چند صارفین نے ویڈیو پر طنزیہ تبصرے کیے تو کئی افراد نے اس پورے معاملے کو سوشل میڈیا کی ایک اور غیر متوقع وائرل کہانی قرار دیا۔
مختصر دورانیے کی اس ویڈیو نے دیکھتے ہی دیکھتے ہزاروں صارفین کی توجہ حاصل کر لی اور ایک بار پھر مفتی قوی کو آن لائن بحث کا موضوع بنا دیا۔