"طلاق کے بعد میری زندگی کا ایک ایسا مرحلہ آیا جب میں خود کو اندر سے بہت کمزور محسوس کرنے لگی تھی۔ ایسا لگتا تھا جیسے میں اپنی وہ شناخت اور اعتماد کھو بیٹھی ہوں جس کے ساتھ برسوں جیتی رہی۔ لیکن وقت کے ساتھ میں نے خود کو دوبارہ سنبھالنا شروع کیا، اور اس سفر میں میرے بچوں نے سب سے اہم کردار ادا کیا۔ آج وہ مجھے آگے بڑھنے، دنیا دیکھنے اور نئی چیزیں آزمانے کی ترغیب دیتے ہیں۔ انہی کی محبت اور حوصلہ افزائی نے مجھے دوبارہ مضبوط بننے میں مدد دی ہے۔"
ہالی ووڈ کی معروف اداکارہ انجلینا جولی نے اپنی نجی زندگی کے ایک نہایت حساس باب پر گفتگو کرتے ہوئے انکشاف کیا ہے کہ سابق شوہر بریڈ پٹ سے علیحدگی کے بعد ان کے لیے زندگی آسان نہیں رہی تھی۔ ایک حالیہ انٹرویو میں انہوں نے بتایا کہ طلاق کے بعد وہ ایک ایسے دور سے گزریں جس نے انہیں جذباتی طور پر گہرے اثرات سے دوچار کر دیا تھا۔
انجلینا جولی کے مطابق اس مشکل مرحلے نے ان کی شخصیت اور خود اعتمادی کو بھی متاثر کیا۔ کچھ عرصے تک انہیں ایسا محسوس ہوتا رہا کہ وہ خود کو پہلے کی طرح نہیں پہچان پا رہیں، تاہم وقت گزرنے کے ساتھ انہوں نے اپنی زندگی کو نئے انداز میں دیکھنا اور خود کو دوبارہ سنبھالنا شروع کیا۔
اداکارہ نے اس تبدیلی کا سب سے بڑا سہرا اپنے چھ بچوں کے سر باندھا۔ ان کا کہنا تھا کہ بچوں کی مسلسل محبت، اعتماد اور حوصلہ افزائی نے انہیں مایوسی سے باہر نکلنے میں مدد دی۔ اب جب ان کے بچے جوانی کی دہلیز پر قدم رکھ چکے ہیں تو وہ اپنی والدہ کو مزید متحرک اور خوش دیکھنا چاہتے ہیں۔
انجلینا جولی نے خوشی سے بتایا کہ ان کے بچے انہیں گھر کی چار دیواری تک محدود نہیں دیکھنا چاہتے بلکہ وہ انہیں سفر کرنے، نئی مہارتیں سیکھنے اور زندگی کے نئے تجربات حاصل کرنے کی ترغیب دیتے ہیں۔ یہی وجہ ہے کہ وہ اب خود کو پہلے سے زیادہ مضبوط اور پُراعتماد محسوس کر رہی ہیں۔
دلچسپ بات یہ ہے کہ انجلینا جولی نے یہ خیالات اپنی نئی فلم کی تشہیر کے دوران بیان کیے۔ فلم میں وہ ایک ایسی خاتون کا کردار ادا کر رہی ہیں جو ازدواجی زندگی کے خاتمے کے بعد اکیلے اپنے بچوں کی پرورش کرتی ہے اور زندگی کے چیلنجز کا سامنا کرتی ہے۔
فلم کی ہدایت کار ایلس وینوکور کے مطابق اس کہانی کی تخلیق کے دوران انجلینا جولی کی حقیقی زندگی سے بھی متاثر ہوا گیا، کیونکہ فلم کے کئی پہلو اداکارہ کے ذاتی تجربات سے مماثلت رکھتے ہیں۔
اپنی گفتگو کے اختتام پر انجلینا جولی نے اشارہ دیا کہ اگرچہ ماضی کے زخم آسانی سے نہیں بھرتے، لیکن انسان محبت، حوصلے اور خاندان کے سہارے دوبارہ اپنی زندگی کو نئی سمت دے سکتا ہے، اور ان کے لیے یہ طاقت ان کے بچوں کی صورت میں سامنے آئی۔