سوئٹزرلینڈ میں ایران اور امریکا کے درمیان مذاکرات کے آغاز کے بعد پاکستان اسٹاک ایکسچینج میں سرمایہ کاروں کا اعتماد بحال ہوگیا جس کے باعث مارکیٹ میں تیزی کا رجحان برقرار ہے۔
کاروبار کے دوران ہنڈرڈ انڈیکس میں 1500 سے زائد پوائنٹس کا اضافہ ریکارڈ کیا گیا جبکہ اتار چڑھاؤ کے باوجود انڈیکس 620 پوائنٹس بڑھ کر 179,544 پوائنٹس پر ٹریڈ کرتا رہا۔ اس دوران 179,000 پوائنٹس کی اہم حد بھی دوبارہ بحال ہوگئی۔
بروکرز کے مطابق اس ہفتے عاشورہ کی تعطیلات کے باعث صرف تین دن کاروبار ہوگا جبکہ رول اوور ویک کی وجہ سے مارکیٹ میں فروخت کا دباؤ بھی موجود ہے۔ ماہرین کا کہنا ہے کہ محدود کاروباری دنوں اور رول اوور ویک کے باعث مارکیٹ میں اتار چڑھاؤ جاری رہ سکتا ہے تاہم مجموعی رجحان مثبت دکھائی دے رہا ہے۔