پاکستان اسٹاک ایکسچینج میں پیر کے روز کاروبار کے دوران زبردست اتار چڑھاؤ دیکھنے میں آیا، جہاں ابتدائی اور وسطی سیشن میں نمایاں تیزی کے بعد مارکیٹ مندی کی لپیٹ میں آ گئی۔
ٹریڈنگ کے دوران ہنڈرڈ انڈیکس میں 1500 سے زائد پوائنٹس کا اضافہ ریکارڈ کیا گیا اور انڈیکس 179 ہزار اور 180 ہزار پوائنٹس کی حدیں بھی عبور کر گیا، تاہم یہ سطحیں برقرار نہ رہ سکیں۔
کاروبار کے اختتام پر 100 انڈیکس 450 پوائنٹس کمی کے بعد 178 ہزار 471 پوائنٹس پر بند ہوا۔
مارکیٹ ماہرین کے مطابق سوئٹزرلینڈ میں ایران اور امریکا مذاکرات کے آغاز کے باوجود سرمایہ کار محتاط رہے جبکہ رول اوور ویک کے باعث فروخت کا دباؤ بھی برقرار رہا۔بروکرز کا کہنا ہے کہ عاشورہ کی تعطیلات اور رول اوور ویک کی وجہ سے مارکیٹ میں غیر یقینی صورتحال اور اتار چڑھاؤ دیکھنے میں آیا۔