وزیر بحری امور جنید انوار چوہدری کی زیرِ صدارت گارمنٹس سٹی کے قیام سے متعلق اہم اجلاس ہوا، جس میں پورٹ قاسم کے علاقے میں 400 ایکڑ رقبے پر گارمنٹس سٹی قائم کرنے کا اعلان کیا گیا۔
اجلاس میں بتایا گیا کہ منصوبے کے پہلے مرحلے میں گارمنٹس سٹی کے لیے 250 ایکڑ زمین مختص کی جائے گی، جہاں اعلیٰ قدر کی حامل ملبوسات کی تیاری اور برآمدات کو فروغ دیا جائے گا۔
وزیر بحری امور جنید انوار چوہدری کے مطابق گارمنٹس سٹی کے قیام سے تقریباً ایک لاکھ 38 ہزار روزگار کے مواقع پیدا ہونے کی توقع ہے، جبکہ منصوبے سے سالانہ 2.2 ارب ڈالر کی برآمدات متوقع ہیں۔
انہوں نے کہا کہ گارمنٹس سٹی میں نجی شعبے کی سرمایہ کاری کو خصوصی اہمیت دی گئی ہے، جبکہ برآمد کنندگان کو سہولت فراہم کرنے کے لیے ون ونڈو نظام متعارف کرایا جائے گا تاکہ مختلف مراحل پر درکار اجازت ناموں اور سہولیات تک آسان رسائی ممکن ہو۔
جنید انوار چوہدری نے بتایا کہ پورٹ قاسم اتھارٹی گارمنٹس سٹی کے لیے ضروری بنیادی سہولیات فراہم کرے گی۔ منصوبے میں ماحول دوست ٹیکنالوجی کے فروغ کو بھی ترجیح دی جائے گی تاکہ صنعتی سرگرمیوں کے ساتھ ماحولیاتی تحفظ کو یقینی بنایا جاسکے۔