عالمی ریٹنگ ایجنسی موڈیز کی جانب سے پاکستان کی کریڈٹ ریٹنگ میں ایک درجے بہتری بھی پاکستان اسٹاک ایکسچینج کو مندی کے اثرات سے نہ بچا سکی۔
آج پاکستان اسٹاک ایکسچینج میں ٹریڈنگ کا آغاز شدید اتار چڑھاؤ کے ساتھ ہوا، جہاں ابتدا میں 484 پوائنٹس کی تیزی دیکھنے میں آئی۔
دورانِ ٹریڈنگ خریداروں کی دلچسپی کی بدولت مارکیٹ میں تیزی 809 پوائنٹس تک جا پہنچی، جس سے 177,000 پوائنٹس کی حد بحال ہوگئی۔تاہم، مارکیٹ اوپر کے لیول پر بحال نہ رہ سکی اور انویسٹرز کی جانب سے شدید منافع خوری (پرافٹ ٹیکنگ) اور فروخت کے شدید دباؤ کے باعث مارکیٹ مثبت سے منفی زون میں داخل ہوگئی۔
شدید اتار چڑھاؤ کے بعد 100 انڈیکس میں 809 پوائنٹس کی تیزی ختم ہوگئی اور مارکیٹ 243 پوائنٹس مندی کی زد میں آگئی، جس کے نتیجے میں ہنڈریڈ انڈیکس 227 پوائنٹس کی کمی کے ساتھ 176,740 پوائنٹس پر ٹریڈ کرتا رہا۔