ایران امریکا معاہدے کی امید اور موڈیز کی جانب سے پاکستان کی ریٹنگ میں بہتری کے باعث پاکستان اسٹاک ایکسچینج میں اس ہفتے مجموعی طور پر استحکام رہا اور مارکیٹ بڑی کریکشن سے محفوظ رہی۔
اسٹاک تجزیہ کاروں کے مطابق ہفتے کے دوران سرمایہ کاروں نے یومیہ بنیادوں پر شیئرز کی خرید و فروخت جاری رکھی۔ چار سیشنز میں 100 انڈیکس 530 پوائنٹس، یعنی 0.3 فیصد بڑھ کر 177,696 پوائنٹس پر بند ہوا۔
رپورٹ کے مطابق انڈیکس کی ہفتہ وار بلند ترین سطح 178,650 جبکہ کم ترین سطح 176,577 پوائنٹس رہی۔ مارکیٹ میں ریکوری کے باعث سرمایہ کاروں کو ہفتے کے دوران 2 ارب 42 کروڑ روپے کا فائدہ ہوا۔
دوسری جانب اوسط یومیہ تجارتی حجم 15.7 فیصد کمی کے بعد 71 کروڑ 27 لاکھ شیئرز رہا، جبکہ اوسط یومیہ تجارتی مالیت 13.8 فیصد کم ہوکر 12 کروڑ 74 لاکھ ڈالر رہی۔
رپورٹ کے مطابق مارکیٹ کی مجموعی سرمایہ کاری مالیت 2 ارب 42 کروڑ روپے اضافے سے 19 ہزار 885 ارب روپے ہوگئی۔