پشاور میں ناردرن بائی پاس کے قریب مبینہ پولیس مقابلے کے دوران بحرین سے لایا گیا اشتہاری ملزم ممتاز اور دو حملہ آور ہلاک ہوگئے، جبکہ فائرنگ کی زد میں آ کر دو ایس ایچ اوز بھی زخمی ہوئے ہیں۔
پولیس کے مطابق ملزم ممتاز بھتہ خوری، قتل، قبضہ مافیا اور دہشت گردی کے 40 سے زائد مقدمات میں پولیس کو مطلوب تھا۔ پشاور پولیس کی درخواست پر بحرین پولیس نے اسے جون میں حراست میں لیا تھا، جسے بعدازاں انٹرپول کے ذریعے گزشتہ رات پشاور منتقل کیا گیا۔
پولیس کا کہنا ہے کہ منتقلی کے دوران ناردرن بائی پاس پر نامعلوم ملزمان نے پولیس کی گاڑی پر فائرنگ کردی۔ پولیس کے مطابق فائرنگ مبینہ طور پر ملزم کے مخالفین نے کی، جس کے نتیجے میں زیرِ حراست ملزم ممتاز موقع پر ہی ہلاک ہوگیا جبکہ پولیس کی جوابی کارروائی میں دو حملہ آور بھی مارے گئے۔
زخمی ہونے والے دونوں پولیس افسران کو فوری علاج جبکہ ہلاک شدگان کی لاشیں ضابطے کی کارروائی کے لیے اسپتال منتقل کردی گئیں۔