جاری مالی سال کے پہلے دو ماہ (جولائی اور اگست) کے دوران پاکستان کا امریکا کے ساتھ تجارتی سرپلس 48 کروڑ ڈالر تک پہنچ گیا ہے۔
وزارتِ تجارت کے ذرائع کے مطابق اس عرصے میں پاکستان نے امریکا کو ایک ارب 17 کروڑ ڈالر کی اشیاء برآمد کیں، جس میں گزشتہ سال کے مقابلے میں 10.46 فیصد اضافہ ریکارڈ کیا گیا، جبکہ امریکا سے 69 کروڑ ڈالر کی درآمدات کی گئیں جس میں 144 فیصد کا نمایاں اضافہ دیکھنے میں آیا۔
اسی عرصے کے دوران امریکا کو پاکستان کے ساتھ 48 کروڑ ڈالر کے تجارتی خسارے کا سامنا کرنا پڑا۔ اس سے قبل مالی سال 26-2025 میں پاکستان کا امریکا کے ساتھ مجموعی تجارتی سرپلس 2 ارب 59 کروڑ ڈالر رہا تھا، جس میں پاکستان کی برآمدات 5 ارب 91 کروڑ ڈالر اور امریکا سے درآمدات 3 ارب 32 کروڑ ڈالر رہی تھیں۔