کراچی کے علاقے سرجانی ٹاؤن میں گھر کے اندر ماں اور اس کے تین بچوں کو قتل کردیا گیا جبکہ واقعے میں زخمی ہونے والی 18 ماہ کی بچی بھی دورانِ علاج دم توڑ گئی۔
پولیس حکام کے مطابق مقتولہ مہوش اور بچوں کو ڈنڈے یا کسی آلے کے وار سے قتل کیا گیا۔ جاں بحق بچوں میں 6 سالہ حرا اور 5 سالہ حنین شامل ہیں، جبکہ 18 ماہ کی اشمیرہ کو زخمی حالت میں نیشنل انسٹی ٹیوٹ آف چائلڈ ہیلتھ منتقل کیا گیا تھا جہاں وہ بھی جانبر نہ ہوسکی۔
پولیس نے مقتولہ کے شوہر دانش کو حراست میں لے لیا ہے۔ ایس ایچ او سرجانی کے مطابق گھر سے تاحال آلہ قتل نہیں ملا جبکہ واقعے کی مزید تحقیقات جاری ہیں۔
پولیس کے مطابق دانش نے گھر پہنچ کر چابی سے گیٹ کھولا تو اندر لاشیں موجود تھیں۔ پولیس نے اطراف میں نصب سی سی ٹی وی کیمروں کی فوٹیجز بھی حاصل کرنا شروع کردی ہیں۔
مقتولہ کے بھائی امجد نے کہا کہ خاندان کی کسی سے دشمنی نہیں دانش اچھا انسان ہے اور میاں بیوی کے درمیان بھی کبھی جھگڑا نہیں ہوا تاہم اہلخانہ نے انصاف کا مطالبہ کیا ہے۔
مقتولہ کی ساس اور بھابھی نے بھی میاں بیوی کے درمیان کسی قسم کے اختلاف یا لڑائی جھگڑے کی تردید کرتے ہوئے شبہ ظاہر کیا کہ مہوش اور بچوں کو گھر میں گھس کر قتل کیا گیا۔