کراچی کے ضلع ویسٹ میں تھانہ مومن آباد کی حدود اورنگی ٹاؤن سیکٹر 10 میں فائرنگ اور تشدد کے واقعے میں 2 افراد جاں بحق ہوگئے ہیں۔
جاں بحق افراد کی شناخت عباس علی ولد عبدالعزیز اور بخت علی ولد قربان علی کے ناموں سے ہوئی ہے۔
ایس ایس پی ویسٹ طارق الٰہی مستوئی کے مطابق پولیس نے اطلاع ملتے ہی بروقت کارروائی کرتے ہوئے فائرنگ میں ملوث مرکزی ملزم عبدالرحیم ولد غلام قادر کو اس کے ساتھی بخت علی ولد محمد صالح سمیت گرفتار کرلیا ہے، جبکہ ملزمان کے قبضہ سے فائرنگ میں استعمال ہونے والا اسلحہ بھی برآمد کرلیا گیا ہے۔
پولیس کے مطابق ملزم عبدالرحیم نے بتایا کہ اس نے اپنے ماموں اور ایک ساتھی کے ہمراہ فائرنگ کرکے اپنے بہنوئی عباس علی کو ذاتی تنازع پر قتل کیا۔ واردات کے بعد فرار ہوتے ہوئے ان کی موٹر سائیکل خراب ہوگئی، جس پر وہاں موجود عوام نے ان کا گھیراؤ کرلیا اور عوام کے شدید تشدد کے نتیجے میں ملزم کا ماموں موقع پر ہی جاں بحق ہوگیا۔
پولیس نے گرفتار ملزمان کو تھانے منتقل کرکے ان کے خلاف قانونی اور ضابطے کی کارروائی کا آغاز کردیا ہے۔