ایران امریکا جنگ رکنے کی امیدوں اور عالمی سطح پر تیل کی قیمتوں میں کمی کے باعث پاکستان اسٹاک ایکسچینج میں رواں ہفتے مجموعی طور پر تیزی دیکھی گئی۔
ہفتے کے دوران منگل، جمعرات اور جمعہ کو مارکیٹ میں تیزی جبکہ پیر اور بدھ کو مندی رہی۔ اس دوران 100 انڈیکس میں 373 پوائنٹس یعنی 0.22 فیصد اضافہ ہوا اور مارکیٹ 170,885 پوائنٹس پر بند ہوئی۔
ہفتے کی بلند ترین سطح 171,037 جبکہ کم ترین سطح 167,442 پوائنٹس رہی۔ مارکیٹ میں ایک لاکھ 68، 69 اور 70 ہزار پوائنٹس کی تین حدیں بھی بحال ہوئیں۔
رپورٹ کے مطابق سرمایہ کاروں کو ہفتے کے دوران 22 ارب 49 کروڑ روپے کا منافع حاصل ہوا، جبکہ مارکیٹ کیپٹلائزیشن 22.5 ارب روپے اضافے سے 19 ہزار 38 ارب روپے ہوگئی۔
دوسری جانب اوسط یومیہ تجارتی حجم 29 فیصد کمی سے 45 کروڑ 23 لاکھ شیئرز جبکہ ڈالر میں اوسط یومیہ حجم 23 فیصد کمی سے 7 کروڑ 49 لاکھ ڈالر رہا۔