کراچی کے علاقے شاہ لطیف ٹاؤن میں بچی کے ساتھ نازیبا حرکت کرنے والا ملزم پولیس مقابلے میں زخمی حالت میں گرفتار کرلیا گیا۔
ایس ایس پی ملیر کے مطابق ریڈیو پاکستان گراؤنڈ میں شاہ لطیف ٹاؤن پولیس اور ملزم کے درمیان مقابلہ ہوا، جس کے بعد خالد محمود نامی ملزم کو زخمی حالت میں گرفتار کیا گیا۔ ملزم کے ہاتھ پر گولی لگی جسے طبی امداد کے لیے اسپتال منتقل کردیا گیا۔
پولیس کے مطابق ملزم کے قبضے سے اسلحہ، چلیدہ خول اور نقدی بھی برآمد ہوئی ہے، جبکہ اس کے خلاف قانونی کارروائی جاری ہے۔ چند روز قبل ملزم کی بچی کے ساتھ مبینہ نازیبا حرکت کی ویڈیو بھی سوشل میڈیا پر وائرل ہوئی تھی۔
دوسری جانب کراچی کے علاقے سرجانی ٹاؤن میں مدرسے کی طالبہ سے نازیبا حرکت کے الزام میں نجف علی نامی ملزم کو بھی گرفتار کیا جاچکا ہے۔ پولیس کے مطابق ملزم کے خلاف مقدمہ درج کرکے مزید قانونی کارروائی شروع کردی گئی ہے۔