شکارپور کے علاقے عبداللہ کالونی میں پراپرٹی کے تنازع پر 10 سالہ بچے پر پیٹرول چھڑک کر آگ لگا دی گئی، جس سے بچہ جھلس کر شدید زخمی ہوگیا۔ متاثرہ بچے کو ابتدائی طبی امداد کے لیے سول اسپتال منتقل کیا گیا، جہاں سے بعد میں اسے سکھر ریفر کر دیا گیا۔
پولیس نے واقعے کا مقدمہ متاثرہ بچے کے والد ایاز مہر کی مدعیت میں درج کرلیا ہے۔ بچے کے والد کے مطابق ملزم ان کا مکان سستی قیمت پر خریدنے کے لیے مسلسل تنگ کر رہا تھا اور اسی تنازع پر ان کے بیٹے کو آگ لگائی گئی۔
ایس ایس پی شکارپور محمد کلیم ملک کے نوٹس پر تشکیل دی گئی خصوصی ٹیم نے کارروائی کرتے ہوئے مرکزی ملزم جاوید اختر بلوچ کو گرفتار کرلیا ہے اور دیگر ملوث افراد کی تلاش سمیت مزید تفتیش جاری ہے۔