ایسٹ زون کے تھانہ نیو ٹاؤن پولیس نے خفیہ اطلاع پر گلشنِ اقبال بلاک 14 کے قریب کارروائی کرتے ہوئے بین الصوبائی منشیات سپلائرز گروہ کے اہم کارندے انعام الرحمن ولد عبد الصمد کو گرفتار کرلیا۔
کی گئی کارروائی کے دوران ملزم کے قبضے اور تین گاڑیوں سے 81 کلو گرام اعلیٰ کوالٹی کی چرس برآمد ہوئی، جس کی عالمی مارکیٹ میں مالیت ڈیڑھ کروڑ روپے سے زائد بتائی جاتی ہے۔ پولیس نے منشیات کی نقل و حمل میں استعمال ہونے والی تینوں گاڑیاں بھی اپنی تحویل میں لے لی ہیں۔
ترجمان پولیس کے مطابق گرفتار ملزم خیبر پختونخوا سے کراچی منشیات سپلائی کرنے والے بین الصوبائی نیٹ ورک کا حصہ ہے۔ ملزم کے خلاف تھانہ نیوٹاؤن میں مقدمہ درج کر کے مزید تفتیش کا آغاز کردیا گیا ہے، جبکہ اس کے سابقہ کرمنل ریکارڈ کی چھان بین اور دیگر فرار ساتھیوں کی گرفتاری کے لیے چھاپے مارے جا رہے ہیں۔