راولپنڈی کے تھانہ رتہ امرال کے علاقے میں سی سی ڈی ٹیم پر تین ملزمان کی فائرنگ کے تبادلے میں 12 سالہ بچی کو مبینہ زیادتی کے بعد قتل کرنے والا ملزم ہلاک ہوگیا جبکہ اس کے دو ساتھی فرار ہوگئے۔
ہلاک ملزم کی شناخت ممریز عباسی کے نام سے ہوئی ہے جس کا تعلق ایبٹ آباد سے بتایا جاتا ہے۔ پولیس کے مطابق ملزم کے قبضے سے 30 بور پستول اور گولیاں برآمد ہوئی ہیں جبکہ فرار ہونے والے ملزمان کی تلاش جاری ہے۔
پولیس کے مطابق ہلاک ملزم مقتولہ بچی کا خالو تھا، جس نے مبینہ طور پر بچی کو زیادتی کا نشانہ بنانے کے بعد گلا دبا کر قتل کیا تھا۔ بچی مدرسے گئی تھی، جہاں سے ملزم اسے اپنے گھر لے گیا اور مبینہ طور پر اس گھناؤنے جرم کا ارتکاب کیا۔
واقعے سے قبل گلی میں ملزم کی بچی سے ملاقات اور اسے پیسے دینے کی فوٹیج بھی سامنے آئی تھی۔ پولیس کی جانب سے واقعے کی مزید تفتیش جاری ہے۔