بھارتی ٹینس اسٹار ثانیہ مرزا کے بیٹے اذہان مرزا ملک کی بالی ووڈ میں انٹری سے متعلق ایک دلچسپ انکشاف سامنے آیا ہے، جس نے مداحوں کی توجہ حاصل کرلی ہے۔ معروف فلمساز اور کوریوگرافر فرح خان نے اذہان کی پیدائش کے وقت ہی اسے فلمی دنیا کا ستارہ بنانے کا منصوبہ بنالیا تھا۔
ثانیہ مرزا نے حال ہی میں بالی ووڈ اداکارہ نیہا دھوپیا اور ان کے شوہر انگد بیدی کے پروگرام ڈبل ڈیٹ میں شرکت کی، جہاں انہوں نے اپنی ذاتی زندگی، بیٹے کی پرورش اور فرح خان کے ساتھ برسوں پرانی دوستی سے جڑے کئی دلچسپ واقعات سنائے۔
گفتگو کے دوران سابق ٹینس چیمپئن نے بتایا کہ تقریباً آٹھ سال پہلے جب اذہان دنیا میں آیا تو فرح خان نے اسے مستقبل میں اپنی فلم کا ہیرو بنانے کا اعلان کردیا تھا۔ صرف زبانی وعدہ ہی نہیں بلکہ انہوں نے باقاعدہ 100 روپے کی رقم بھی دی، جسے مذاقاً اذہان کی پہلی فلم کا معاوضہ قرار دیا گیا۔
ثانیہ کے مطابق یہ واقعہ ان کے لیے اتنا خاص تھا کہ انہوں نے وہ نوٹ خرچ کرنے کے بجائے ایک خوبصورت یاد کے طور پر محفوظ کرلیا جو آج بھی انہیں فرح خان کی محبت اور اپنائیت کی یاد دلاتا ہے۔
دلچسپ بات یہ ہے کہ فرح خان اپنے اس پرانے وعدے کو بھولی نہیں ہیں۔ فروری 2025 میں جب ثانیہ اپنے بیٹے کے ہمراہ فرح کے یوٹیوب کوکنگ وی لاگ میں نظر آئیں تو وہاں بھی اس موضوع پر خوب ہنسی مذاق ہوا۔
ویڈیو کے دوران اذہان نے شرارت کرتے ہوئے فرح کو اشارہ دیا کہ وہ ان کے صوفے پر چیونگ گم چپکا سکتا ہے۔ اس پر فلمساز نے فوراً اسے یاد دلایا کہ مستقبل میں وہی اسے فلموں میں موقع دینے والی ہیں اور وہ ان کا ہیرو بنے گا۔
ثانیہ اور فرح کی دوستی بھی شوبز اور کھیلوں کی دنیا میں خاص پہچان رکھتی ہے۔ دونوں اکثر ایک دوسرے کے ساتھ بے تکلف انداز میں نظر آتی ہیں اور ان کے درمیان موجود اپنائیت کسی خاندانی رشتے سے کم نہیں سمجھی جاتی۔
واضح رہے کہ اذہان مرزا ملک کی پیدائش 2018 میں ہوئی تھی۔ وہ پاکستانی کرکٹر شعیب ملک اور ثانیہ مرزا کے بیٹے ہیں۔ والدین کی شہرت کے باعث اذہان بھی اکثر سوشل میڈیا پر توجہ حاصل کرتے رہتے ہیں۔
دوسری جانب ثانیہ مرزا اپنے بیٹے کے مستقبل کے حوالے سے نہایت واضح سوچ رکھتی ہیں۔ ایک انٹرویو میں انہوں نے بتایا تھا کہ اذہان کو کھیلوں سے خاص لگاؤ ہے۔ وہ فٹ بال اور ٹینس کھیلنے کے علاوہ تیراکی سے بھی لطف اندوز ہوتا ہے، جبکہ ڈرم بجانا بھی اس کے پسندیدہ مشغلوں میں شامل ہے۔
ماں بننے کے تجربے پر بات کرتے ہوئے ثانیہ نے اپنے جذبات کا اظہار کچھ یوں کیا تھا کہ اذہان نے ان کی زندگی میں محبت کا ایک ایسا احساس پیدا کیا جس کا کوئی نعم البدل نہیں۔ ان کے نزدیک بیٹے کی پرورش کے سفر نے انہیں خود بہت کچھ سکھایا اور ان کی شخصیت میں مثبت تبدیلیاں پیدا کیں۔
ثانیہ کا ماننا ہے کہ بچوں کو والدین کی خواہشات کے مطابق ڈھالنے کے بجائے ان کی اپنی دلچسپیوں اور صلاحیتوں کو پروان چڑھانے کا موقع ملنا چاہیے۔ اسی لیے وہ اذہان کو کسی ایک پیشے تک محدود نہیں کرنا چاہتیں۔
سابق ٹینس اسٹار کے مطابق ان کے اپنے والدین نے بھی انہیں زندگی میں فیصلے کرنے کی آزادی دی تھی اور وہ اپنے بیٹے کے لیے بھی ایسا ہی ماحول فراہم کرنا چاہتی ہیں، جہاں وہ بغیر کسی دباؤ کے اپنی منزل کا انتخاب کرسکے۔
اب فرح خان کا برسوں پرانا وعدہ حقیقت کا روپ دھارتا ہے یا اذہان اپنے والدین کی طرح کھیلوں کی دنیا میں نام بناتا ہے یہ تو آنے والا وقت ہی بتائے گا۔ فی الحال اس کی بالی ووڈ میں باقاعدہ انٹری یا کسی فلم میں کام کرنے کی تصدیق سامنے نہیں آئی ہے۔