کمپٹیشن کمیشن آف پاکستان نے لوٹے کیمیکل پاکستان لمیٹڈ کو اینگرو کارپوریشن لمیٹڈ سے اینگرو پولیمر اینڈ کیمیکلز لمیٹڈ کے حصص خریدنے کی منظوری دے دی ہے۔
منگل کو جاری اعلامیہ کے مطابق سی سی پی نے فیز ون جائزہ میں پی وی سی، کاسٹک سوڈا اور ہائیڈروجن پر آکسائیڈ کی مارکیٹس کا جائزہ لیا اور قرار دیا کہ دونوں کمپنیوں کے کاروبار میں نہ ہی افقی اور نہ ہی عمودی اوورلیپ موجود ہے۔
کمیشن کے مطابق مجوزہ ٹرانزیکشن سے مارکیٹ میں ارتکاز بڑھنے، نئی کمپنیوں کے داخلے میں رکاوٹ پیدا ہونے یا کسی فریق کی مارکیٹ پاور میں نمایاں اضافے کا امکان نہیں۔
سی سی پی نے نتیجہ اخذ کیا کہ یہ ڈیل متعلقہ مارکیٹس میں مسابقت کو متاثر نہیں کرے گی جس پر اسے کمپٹیشن ایکٹ 2010 کے تحت منظور کر لیا گیا۔
سی سی پی کے مطابق یہ منظوری سرمایہ کاری اور جائز کارپوریٹ ٹرانزیکشنز کی سہولت کاری کے ساتھ ساتھ مارکیٹ میں مؤثر کمپٹیشن اور صارفین کے مفادات کے تحفظ کے عزم کی عکاس ہے۔