’’گزشتہ دو ہفتوں میں میری زندگی ایسے امتحان سے گزری جس کا میں نے کبھی تصور بھی نہیں کیا تھا۔ ابتدا پتے میں پتھری کی تشخیص سے ہوئی، لیکن آپریشن کے بعد صورتحال اس قدر بگڑ گئی کہ میں زندگی اور موت کے درمیان پہنچ گئی۔ پتا نکلوانے کی سرجری کے بعد مجھے لبلبے کی شدید سوزش ہوگئی، جس نے میری صحت کو بری طرح متاثر کیا۔
ہم زندگی میں چھوٹی چھوٹی باتوں کی فکر کرتے ہیں، آنے والے دنوں کے منصوبے بناتے ہیں اور سمجھتے ہیں کہ ہمارے پاس بہت وقت ہے، لیکن اچانک ایک لمحہ ایسا آتا ہے جب انسان کی سب سے بڑی خواہش صرف دوبارہ صحت مند ہونا رہ جاتی ہے۔
کبھی تکلیف اتنی بڑھ جاتی ہے کہ اسے بیان کرنے کے لیے الفاظ بھی نہیں ملتے، مگر اللہ ہر درد، ہر آنسو اور دل میں چھپے خوف سے واقف ہے۔ اس مشکل وقت نے مجھے سکھایا کہ شفا صرف اللہ کے ہاتھ میں ہے اور زندگی اس کی دی ہوئی امانت ہے۔
میں اب بھی جسمانی، ذہنی اور روحانی طور پر صحت یابی کے مراحل سے گزر رہی ہوں۔ ہر دن ایک نئی امید اور ہر دعا مجھے بہتر ہونے کا حوصلہ دیتی ہے۔ جن لوگوں نے میرے لیے دعائیں کیں، میرا حال پوچھا اور مشکل وقت میں میرا ساتھ دیا، میں ان سب کی دل سے شکر گزار ہوں۔ اللہ ہر بیمار کو مکمل شفا عطا فرمائے۔ آمین۔‘‘
یہ جذباتی الفاظ پاکستان کی معروف ٹی وی میزبان رابعہ انعم نے اپنی حالیہ انسٹاگرام پوسٹ میں لکھے، جس کے ذریعے انہوں نے پہلی مرتبہ اپنی سنگین بیماری اور علاج کے دوران پیش آنے والی مشکلات کی تفصیلات مداحوں کے ساتھ شیئر کیں۔
رابعہ انعم کے مطابق انہیں ابتدا میں پتے کی پتھری کا مسئلہ درپیش تھا، جس کے علاج کے لیے سرجری کروائی گئی۔ تاہم آپریشن کے بعد وہ پینکریاٹائٹس یعنی لبلبے کی سوزش میں مبتلا ہوگئیں اور ان کی طبیعت تشویشناک حد تک خراب ہوگئی۔
میزبان نے بتایا کہ بیماری کے ان دنوں نے انہیں زندگی کی حقیقت اور صحت کی اہمیت کا ایک نیا احساس دلایا۔ ان کے لیے یہ وقت صرف جسمانی تکلیف کا نہیں بلکہ جذباتی اور روحانی آزمائش کا بھی تھا، جس میں اللہ پر بھروسے اور اپنوں کی دعاؤں نے انہیں ہمت دی۔
رابعہ انعم نے قرآن پاک کی آیت ’’بے شک ہر مشکل کے ساتھ آسانی ہے‘‘ کا حوالہ دیتے ہوئے کہا کہ انسان کا مضبوط ہونا اس بات کی ضمانت نہیں کہ وہ کبھی کمزور نہیں پڑے گا، بلکہ مشکل حالات میں صبر اور اللہ پر یقین ہی اصل سہارا بنتا ہے۔
یاد رہے کہ رابعہ انعم نے اپنے کیریئر کا آغاز جیو نیوز سے بطور نیوز اینکر کیا تھا، جہاں کئی برس کام کرنے کے بعد انہوں نے دیگر شعبوں میں اپنی شناخت بنائی۔ وہ گرین انٹرٹینمنٹ کی رمضان ٹرانسمیشن میں دانش تیمور کے ساتھ میزبانی بھی کر چکی ہیں۔ رابعہ اپنے شوہر عبید رحمان اور بچوں کے ساتھ دبئی میں مقیم ہیں۔
ان کی صحت سے متعلق اس انکشاف کے بعد شوبز شخصیات اور مداحوں نے تشویش کا اظہار کیا ہے۔ اداکار دانش تیمور، فاطمہ آفندی اور عرزا خان سمیت کئی معروف شخصیات نے ان کی جلد صحت یابی کے لیے دعائیں کیں۔
سوشل میڈیا صارفین بھی میزبان کے لیے نیک خواہشات کا اظہار کر رہے ہیں، جبکہ رابعہ انعم نے واضح کیا ہے کہ وہ ابھی مکمل طور پر صحت مند نہیں ہوئیں اور بتدریج صحت یاب ہو رہی ہیں۔